சித்தர்கள் அரிய பல சித்தமருந்துகளை மறைப்பதன் உண்மையான காரணம்.

சில மாதங்களுக்கு முன்னர் இயற்கை உணவு உலகத்தின் வாசகர் ஒருவர்  பின்னோட்டத்தில் ஒரு கேள்வி எழுதி இருந்தார். அவர் அனுப்பிய செய்தி  பின்வருமாறு.
// தயவு செய்து மருந்துகளையும் உங்கள் வலைப் பதிவிலேயே தெரிவியுங்கள்
நீங்கள் நீரிழிவு நோய்க்கு கூறிய மருந்தை நான் பல பேருக்கு சொல்லி
மின்னஞ்சல் மூலமாக தெரிவித்ததன் காரணமாக பல பேர் இன்று
பயனடைந்திருக்கிறார்கள். இதை வைத்து பிழைக்க நினைக்கும் சில
அற்பர்களுக்காக பல பேருக்கு போய்ச் சேர வேண்டிய கருத்தை
மறைக்காதீர்கள் இப்படி மறைத்து மறைத்துத்தான் பல இயற்கை மருந்துகள்
தெரியாமலே போய் விட்டன. //

அன்பருக்கு தாங்கள் முதலில் ஒன்றை நன்றாக புரிந்து கொள்ள வேண்டும்.  இந்த மருந்தை கண்டுபிடித்தது நாம் அல்ல , ஏற்கனவே சித்தர்கள்  கண்டுபிடித்து எழுதி வைத்ததைத்தான் நாம் சொல்கிறோம்.நமக்கு பரிபாசையில் இருக்கும் மருந்தை புரிய வைத்த எம் குருநாதர் அகத்தியர் சொல்லும் அத்தனை நிபந்தனைகளுக்கும் நாம்  கட்டுப்பட்டவராகத்தான் இருக்க முடியும். குருநாதர் நூலில் தெரிவித்ததை அப்படியே தெரிவிக்கிறோம்.

“ வண்டருக்கும் திருடருக்கும் வெளிவிடாதே
ஈனமுற்ற சண்டாளர்க்கு ஈயவேண்டா
இன்பமுடன் இந்நூல்மேல் இச்சைவைத்து
தானமுற்றுத் தொண்டு செய்வோர் தனக்குஈந்தால்
தர்மமுடன் கர்மமில்லை சாற்றக்கேளே ”
– ( அகத்தியர் 12000 ,1.பகுதி 4)

“ விடாதே வெளியொருக்காலும் விட்டாயா னால்
விழுமிடி தலைதெறித்து நசித்துப் போவாய்
விடாதே இவ்வெண்ணூற்றைப் புலத்தியாகேள்
விடுத்தவிற்கர்ம நோய்வினை வந்தெய்தும் ”
– ( அகத்தியர் பஞ்ச காவிய நிகண்டு 14 )

“ வேண்டாத சீசர்களைச் சேர்க்க வேண்டாம்
வெளியிலே என்நூலைக் காட்ட வேண்டாம்
பூண்டாசை கொண்டோருக்கு என்நூ லீய்ந்தால்
புழுத்துமே சாகவென்னா லீந்திடாயே ”
– ( அகத்தியர் தர்க்க சாத்திரம் 300:132)

கேள்வி கேட்டு இருந்த அன்பருக்கு தோன்றிய எண்ணம் நமக்கும் இருந்தது  ஒரு காலத்தில், சித்தர்கள் எல்லாம் சுயநலக்காரர்கள் போல இவ்வளவு அரிய பல ரகசியங்களை எல்லாம் அடுத்தவர்களுக்கு வெளிப்படையாகச்  சொல்லக்கூட தடை போட்டு இருக்கின்றனரே என்று. ஆனால் இந்த எண்ணம்  தோன்றிய சில நாட்களிலே உண்மையை புரிய வைத்துவிட்டனர்,  உதாரணத்துடன் சொல்கிறோம். “ சித்தர்கள் அருளிய மூன்று நோய்க்கு ஒரே மருந்து ” இந்த நோய்க்கான மருந்தில் முக்கியமான மூலிகை ஒன்று சேர்க்க வேண்டும் இந்த மூலிகை “ ரசவாத மூலிகை ” இது நமக்கு தெரியாது. 15 பேருக்கு கொடுத்து நல்ல குணம் கிடைத்த பின் ஒரு சித்த மருத்துவர் இந்த மூலிகையின் பெயரைச்சொல்லி கேட்டார் நாமும் நாளை குருவின் அனுமதி பெற்று சொல்கிறோம் என்று சொல்லி விட்டு சென்றோம். இரவில் தொடர்ந்து மூன்று முறை போன் செய்து சொல்வீர்களா என்றார் நமக்கு புரியவில்லை ஏன் இவ்வளவு அவசரம் என்று நினைத்து அகத்தியரின் நூலை புரட்டினால் ஒரு உண்மை புரிந்தது ஆம் இது ரசவாத மூலிகை தான் என்று. உடனடியாக அவருக்கு போன் செய்து இது ஆட்கொல்லி மூலிகை இதைச் சொல்ல நமக்கு அனுமதி இல்லை என்று சொல்லி விலகிவிட்டோம், நம் நெருங்கிய  வட்டத்தில் இருக்கும் நபர்களிடம்  விசாரித்து இருக்கிறார் அவர்கள் எல்லோரும் எங்களுக்கு அதுபற்றி எதுவும் தெரியாது என்று கூறியதால் அவர் இம்மருந்து கொடுத்து குணமான ஒருவரிடம் சென்று கேட்டு அந்த மூலிகை பற்றி தெரிந்து கொண்டு சென்றிருக்கிறார். மூலிகை பற்றி கூறிய நபர் விபரம் புரியாமல் அவர் வந்து கேட்டதையும் இவர் சொல்லியதையும் நமக்கு உடனடியாக தெரியப்படுத்தினார். உடனடியாக ரசவாதம் செய்து பார்த்து இருக்கிறார் ஆனால் தங்கம் வரவில்லை. ஆத்திரக்காரனுக்கு புத்திமட்டும் என்பதை இவர் நிரூபித்துள்ளார் எப்படி என்றால் குறிப்பிட்ட நேரத்தில் குறிப்பிட்ட திதி உள்ள உள்ள நாட்களில் அந்த மூலிகையை பறித்து, பறித்த எத்தனை மணி நேரத்திற்குள் அதை செய்ய வேண்டும் என்றும் விதி உள்ளது. சில நேரங்களில் தவறான திதி இருந்தால் அது அவரின் கண்ணையே பறித்துவிடும். ஆசை என்னவெல்லாம் செய்ய தூண்டுகிறது என்று பார்த்தீர்களா இப்போது தான் சித்தர்கள் ஏன் பலவற்றை மறைத்து வைத்தனர் என்ற உண்மை புரிந்தது.

ஒரு பன்னாட்டு மருந்து தயாரிக்கும் நிறுவனத்தின் உரிமையாளர் அகத்தியர் அருளிய மூன்று நோய்க்கு  ஒரு மருந்து பற்றி விசாரித்தார் நாமும் அந்த மூலிகையை அரைத்து கொடுக்கிறோம் மற்ற மூலிகைகளைப் பொருட்களை நீங்களே வாங்கி மருந்து எண்ணெய் செய்து குறைந்த விலையில் விற்பனை செய்யலாமா என்றேன், தாராளமாக என்றார் நீங்கள் அரைத்து கொடுக்கும் மூலிகைக்கு எவ்வளவு காசு வேண்டும் என்று நம்மிடம் கேட்டார் அரைத்து கொடுக்கும் நபருக்கு மட்டும் 200 ரூபாய் கொடுங்கள் என்றேன், மற்ற மருந்து பொருட்களுக்கான கொள்முதல் விலை ரூ.100 க்குள் இருக்கும் இதைவைத்து 2 பேருக்கு மேல் கொடுக்கலாம்.எவ்வளவு விலைக்கு விற்பனை செய்யப்போகிறீர்கள் என்றேன் அவர் ஒரு பாட்டில் விலை ரூ.1000 என்றார். 300ரூபாய்க்கு கொடுத்தாலே உங்களுக்கு லாபம் கிடைக்குமே இது மிகவும் அதிகம் என்றேன். அதற்கு அந்த நபர் கூறிய  பதில் நாங்க உம்மைப்போல் சேவை செய்ய வரவில்லை பிழைக்கும் உலகில் நீங்கள் எங்களை பிழைக்கவிடாமல் செய்கிறீர்கள் என்றார், சேவை செய்வதற்கு  எங்க நிறுவனம் தயார் இல்லை என்றார். ஐயா நாம் வருகிறோம் உங்களை தொந்தரவு செய்யவில்லை என்று கூறி வந்துவிட்டோம். குருவின் ஆசி இருந்தால் விரைவில் இந்த மருந்து எல்லோருக்கும் கிடைக்கும்.அதுவரை சித்தர்கள் அருளிய மூன்று நோய்க்கு ஒரு மருந்து பற்றி கேட்க வேண்டாம் என்று தெரிவித்துக்கொள்கிறோம்.